O MpDC condena enerxicamente o ataque israelí contra a “Frota da Liberdade”

Desde o Movemento polos Dereitos Civís considéranse os ataques sufridos por Free Gaza no só xa coma unha vulneración flagrante dos dereitos das persoas, senón que escapan á comprensión de como un goberno -que aínda por riba goza de lexitimidade internacional- pode atacar civís que tiñan como único obxectivo axudar a outros.

14 mortos e máis de 30 feridos son o balance do odio e da carraxe máis fonda que os israelís profesan cara os dereitos da poboación palestina, que desa “Frota da Liberdade” ía recibir alimentos, mediciñas e outros enseres de primeira necesidade.

O MpDC pregúntase como se poden vulnerar desde xeito o dereito internacional e os dereitos civís. A Unión Europea e os líderes mundiais deben responder agora e facer ver tanto ao pobo palestino como ao resto do mundo que Israel non pode quedar impune por estes asasinatos e incontábeis magoamentos dos dereitos das persoas.

Dereitos Civís condena con toda a súa enerxía esta nova acción de Israel que, lembremos, recentemente vén de expulsar sen ningún motivo a dous activistas galegos que ían levar risas a Palestina polo único feito de achegar solidariedade a ese pobo, ao igual que a “Frota da Liberdade”.