Ola lector ,  benvido  |  entra  |  rexístrate agora  |  Axuda?

O MpDC lamenta a última atuación policial contra a cidadanía en Compostela

Written By Virgulino on 6/4/09 | 11:39


O Movemento polos Dereitos Civís critica novamente a impunidade coa que os corpos e forzas de seguridade do Estado xulgan e actúan contra a cidadanía. Neste caso, o colectivo quéixase de que un organismo público, que se supón aconfesional e laico do mesmo xeito que o propio Estado, identifique e increpe a diversas persoas aludindo a que “poden atentar” contra a liberdade de culto. Dados os feitos, o Movemento pregúntase os intereses de quen velan os ditos corpos cando os argumentos que ofrecen para xustificar as súas actuacións se limitan a “poden antentar”.

Ao respecto, o MpDC fai pública a súa queixa sobre este novo intento de restrinxir o lexítimo dereito de reunión e controlar as mobilizacións sociais que unha e outra vez poñen en práctica os corpos policiais. Ademais, desde Dereitos Civís ponse de manifesto a necesidade da creación dun organismo independente que vele polos dereitos dos cidadáns pois as inercias creadas entre as distintas autoridades, institucións e administracións non permiten a realización dun traballo obxectivo de defensa dos dereitos da cidadanía e si deixan que os actuais corpos de seguridade do Estado velen polos intereses do poder establecido.

Segundo critican os convocantes do evento Mariscrista09, as Panteras Rosa Galiza, un grupo de policías achegáronse até a compostelana Praza do Pan pouco antes do inicio formal do acto e identificaron ducias de persoas que agardaban a saída da manifestación festiva na que o colectivo quería chamar a atención sobre as últimas declaracións da igrexa a respecto da reforma da lei do aborto baixo o lema “Afasta o teu rosário dos meus ovários”.

Tal e como se pode ler no blogue das Panteras Rosa Galiza, os policías procederon “á identificación e retención de decenas de participantes e ameazas de inculpación por atentar contra a liberdade de culto”. Logo dalgúns momentos de tensión, a marcha deu comezo. O que pretendía ser unha protesta "festiva e retranqueira" coa finalidade de criticar o Vaticano e a Igrexa Católica e ser tamén unha achega desde Galiza ao movemento internacional No Vat, xurdido en Italia, contou de novo co “protagonismo” policial.

6 comentarios:

Publicar un comentario