O Alcalde de Santiago mentiu ao “Defensor del Pueblo”

O Concello de Santiago vén de informar ao Xulgado do Contencioso nº2 de Santiago, que non lle consta que exista expediente específico a respeito dun membro do MpDC sobre o que lle afirmara a “Defensor del Pueblo”que sí posuía

O MpDC requeriu do “Defensor del Pueblo” que lle proporcionara información do Concello de Santiago por unha intromisión no dereito á honra levada a cabo polo Alcalde de Compostela o Sr Sánchez Bugallo, quen arremetera contra un dos membros do Movemento polos Dereitos Civís do que dixo que “ la actuación de este ciudadano obedece a ciertos condicionantes inherentes a su propia personalidad, y que se demuestran en reiteradas ocasiones ... según consta en los archivos de esta Policía Local de Santiago de Compostela”.

Perante esta información o afectado solicitou ao Concello copias dos arquivos policiais que, de existiren, serían recollidos de forma ilegal pois o membro do MpDC nunca fora sancionado. Documentación que non foi facilitada polo Concello, motivo polo que se presentou deunucia ante o Contencioso número dous de Santiago.

Sen embargo, despois de dous requirimento do Xulgado (o segundo baixo ameaza de sanción) o Concello nega agora a existencia dun expediente específico sobre o afectado. Informa de que a única documentación que dispón sobre el son tres escritos remitidos ao Defensor del Pueblo e outro ao Valedor do Pobo en contestación aos requirimentos realizados por esas Institución a raíz de investigacións realizadas polo MpDC en relación coas cámaras de vivdeovixiancia e a negativa da Policía Local de Santiago a identificarense cando llo requiren os cidadáns.

O MpDC pregúntase que tería acontecido de ter sido o denunciante quen realizase esas manifestacións contra o alcalde. Estamos ante unha clara vulneración do Dereito ao Honor, do principio de igualdade e posiblemente dun delito de Falsedade en Documento Público.

Na prensa: A Voz de Galicia

Seguir lendo

A Policia Local de Compostela continúa a limitar a liberdade de expresión

Un grupo de estudantes das asembleas da USC foron retidos na semana pasada unicamente por colar cartaces nos espazos habilitados
O Concello de Compostela segue sen cambios reais en canto á comunicación social

Segundo nos fixeron saber os propios afectados, un grupo de tres estudantes foi retido na semana pasada pola Policía Local de Compostela cando estaban a colar carteis dunha campaña das asembleas da USC nos espazos habilitados. A Policía Local emprende así unha función de limitación da liberdade de expresión de Compostela que nos confirma que non existen cambios nunha situación que se prolonga ao longo dos anos.

Na operación, os policias requisaron un dos cartaces que portaban os mozos, retivéronos dez minutos e rexistraron todas as súas pertenzas, nunha evidente extralimitación das súas funcións que non ten máis sentido posíbel que obstaculizar a libre comunicación social.

Despois de catro anos a situación é a mesma

Na cidade de Compostela fíxose frecuente que as organizacións sociais tivesen que sufrir multas e sancións pola simples razón de tentar espallar as suas mensaxes por meio da colada de carteis e autocolantes, realización de murais, ou reparto de panfletos; precisamente a presión social levou nos últimos tempos a algunha medida inicialmente positiva por parte das autoridades municipais, como a reforma da Ordenanza de Medio Ambiente e a súa conversión nunha Ordenanza Municipal de Publicidade Estática e Dinámica, aprobada o 12 de febreiro do 2003, despois de diversas protestas e solicitudes dos colectivos e diversas asociacións que se atopaban sen lugares específicos onde colgar os seus cartaces informativos ou programacións.

Sen embargo, a tónica na que vivemos é a mesma: utilización da Policía Local para funcións que non teñen nada que ver coa seguridade e si coa censura, utilización dos operarios do servizo de limpeza do concello para retirar os cartaces informativos que se atopan colocados atendendo á normativa local de publiciade estática, etc...

O Concello de Santiago opta na práctica por minimizar a súa propia normativa na parte que impón obrigas ao propio Concello. Esta nova retención confirma que este é o camiño emprendido en firme polo Concello.

O Movemento polos Dereitos Civís, ante a falta de resposta por parte do Concello de Santiago de Compostela, dirixirase hai tempo ao “Defensor del Pueblo”, para que este intercedera ante a citada administración local de cara a obter unha resposta á nosa pregunta sobre as medidas previstas e adoptadas xa para dar cumprimento íntegro á ordenanza, e á nosa petición de que se aplicara a ordenanza na súa totalidade e non só na súa vertente sancionadora. Polo tanto, o Defensor dirixiuse en reiteradas ocasións ao Concello sen que tampouco el obtivera resposta.

En setembro do 2006, o Concello remitiu un informe, do cal o Defensor nos enviou un extracto, onde recoñece que os valados das obras non están adaptados á Ordenanza Municipal de Publicidade Estática e Dinámica, e que neste momento se estaban a colocar 18 novos soportes, o cal evidenciaba que os existentes ata ese momento non eran suficientes. En canto á apertura de espazos libres (unha trintena de paneis de reducidas dimensións) para a colocación de carteis, se ben se tratou dunha medida positiva, grande parte destes novos paneis foron colocados en zonas periféricas da cidade e lugares pouco transitados, están case que agochados, mentres que os existentes no centro son mínimos ou case nulos, co cal tampouco se está a cumprir a finalidade, que é a comunicación social, para o cal deben estar colocados en lugares onde poidan ser útiles aos cidadáns e cidadás.

Por todos estes motivos, desde o MpDC solicitamos ao concello de Santiago que cumpra cun texto, o relativo á Publicidade Estática, que foi aprobado pola súa Corporación fai catro anos, e que, polo momento, aínda non se viu reflectido en cambios reais na situación da cidade neste aspecto. Entendemos que é imprescindíbel que a Policía Local deixe de manter estas atitudes intimitidatorias contra a cidadanía e contra a liberdade de expresión.

Seguir lendo

Estudantes violentos ameazan as rúas...

Reproducimos o escrito que nos fixeron chegar desde o movimento asemblear de Compostela

Na noite do martes 20 de febreiro, tres compañeir@s das asembleas de físicas, farmacia e traballo social fomos retidos pola policía local, que en vista de que portabamos unha vasoira, deduciu que eramos perigos@s. Si, levabamos unha vasoira, e non tiñamos licenza de armas (vaia imprudencia...). A vasoira era obviamente para colar uns cartaces. Pero deberon pensar que iamos atracar un banco.

Andabamos de camiño ao campus Norte coa intención de colar os últimos cartaces aprobados. Cando vemos que pasa un coche da local e fai unha violenta parada no medio da estrada. Da marcha atrás a grande velocidade (nese momento até me preocupei de mirar se viña un coche detrás, porque a hostia podía ser fina...) nunha grande avenida e montan o paseo dando un volantazo. O resultado: cáelles o tapacubos ante as nosas miradas estupefactas. Eu estaba flipando...

Bon, que baixan e nos preguntan que se imos facer pintadas. Comentámoslles que non, que simplesmente imos colar uns cartaces. "A verlos". Amosámosllelos. Gostan deles e quedan con un. Estiven por dicirlle que se llo asinaba, pero pasei , que non tiñan cara de amigos.

Identificación. Ante a petición (en todo momento educada) dunha razón para a identificación, recibimos un pouco cordial: "porque me da la gana", seguido dun aínda menos cordial: "sólo con verte la cara sé que te tengo que identificar". Dámoslles os DNIs, agás un/ha de nós (que o perdera esa mesma tarde) e tómanlle os dados. Proceden ao rexistro: dúas de nós levabamos mochila. Consideramos que xa é abusivo e soltamos un tímido "Pero tedes dereito...", ao que nos respostan cunha violenta mirada e un clásico de peli de vaqueiros: "a ver: podemos hacerlo por las buenas...". Pasamos de movidas e amosamos as mochilas. Céntranse nuns CDs. Obvian a bomba e o bazoka.

Despois de reternos uns 10 minutos nos que se adicaron a telefonar ao xulgado "por se tiñamos causas pendientes" (por se eramos da ETA), e tocar as pintadas dos arredores por se estaba fresca a pintura (que ben adestrados, estes maderos...) déixannos marchar. Perdónannos a vida. Supoño que non a montaron polo tema de que nos faltaba un DNI porque qué cara se lles quedaría se chegasen á comisaría e lles dixesen aos que alí estivesen: "identificámolos porque levaban unha vasoira...".

Menos mal que a miña liberdade "está salvagardada" por esta xente... Menos mal que están aí, nas rúas para defendernos de... estudantes con vasoiras. Que ben nos protexen... O outro día entereime de que no ano 2006 morreron 1352 traballadoras/es vítimas da mesma precariedade laboral que nos espera cos planos de Boloñas, cos EEESs, coas reformas laborais, cos acordos de negociación colectiva... neste mundo precario. Casi 4 mortos ao día! E estes rexistrando mochilas de perigos@s estudantes rebeldes armad@s con vasoiras! Onde están cando sucede algunha desas mortes evitábeis?

Total: que coartaron a nosa liberdade ambulatoria SEN NENGUNHA XUSTIFICACIÓN (nin tan sequer empezáramos a colar nengún cartaz), incorrendo nun delito: detención ilegal. Pero de denunciármolo, desestimarían a denuncia argüindo que "era un controlo rutinario". Só se trataba de asustarnos un ratiño, ameazándonos con que se colabamos algún cartaz fóra dos espazos destinados para iso (si, os 4 que hai en Compostela) nos ían denunciar. Un problema central na sociedade, a colada de cartaces.


Eu pregúntome: desde cando a policia é un corpo "preventivo"? Seguro que aos de Juventudes Socialistas non os reteñen nen nada cando saen a colar os cartaces para facer campaña para algunha elección desas. Claro, é que unha vez cada catro anos non fai dano. O acontecido non evidencia senón a represión "preventiva" que sofre un/ha moz@ con tan só decidirse a facer algo para protestar contra unha inxustiza. O problema é cando alguén actúa sen agardar por "representantes". Pois, señores maderos, non imos parar.

Liberdade de expresión! Non ao estado policial!
Paremos a mercantilización do ensino!

Seguir lendo