Bloquean unha web por informar sobre a represión do alcalde franquista d’Ogrobe

Xudicialízase a información sobre a represión franquista, como no proceso aberto contra Dionisio Pereira, e de novo a petición dos familiares dos franquistas
Trátase do xulgado número 2, o mesmo que admitiu a trámite a denuncia contra dous blogues no Salnés

O titular do Xulgado número 2 de Cambados, que xa manifestou a súa vontade intervencionista da rede ao admitir a trámite a denuncia do PP contra dous blogues no Salnés, decidiu clausurar parte dunha web na que o fillo do exiliado Ramón Garrido colgou os diarios do seu pai, nos que se acusaba ao alcalde franquista de Ogrobe, Joaquín Álvarez Lores, de elaborar as listas dos 'paseados'. A sala tomou esa decisión tras estudar a denuncia interposta polos familiares de, alcalde do Grove durante a ditadura de Primo de Rivera e, posteriormente, durante o franquismo.

O caso é particularmente grave na medida en que o xuíz fai seus os argumentos dos profranquistas e afirma que documentar a represión dun réxime franquista é un problema para a “honra” dos familiares: “rememorar tantas décadas despois o que mediáticamente chámase "memoria histórica" de forma revanchista, incontrolada, aviesa ou sen datos certos que acrediten o que se afirma, vulnera de forma certa a honra e fama das persoas e as súas familias». Precisamente cando vimos dun ano celebrado como “da memoria” o xuíz segue a asociar a loita contra a manipulación da historia do fascismo, e o sinalamento dos seus responsábeis, como propio dunha atitude “revanchista”. Ao igual que no recente caso de Dionisio Pereira baséase no feito de non existir unha condena firme nen fontes documentais, algo que obviamente é imposíbel de obter dun réxime ditatorial como o que nos referimos.

Do MpDC xa advertimos que as demandas apresentadas contra os blogues polo Partido Popular e a demanda contra Dionisio Pereira podían ser un indicio de que a rede molestaba en determinados sectores políticos que pretendía censula, por unha banda, e que existía unha estratexia para cortar as actividades de historiadores e colectivos para prolongar a amnesia a respeito do noso pasado máis recente e a exculpación dos fascistas polos seus sucesores e defensores, pola outra. Podemos dicer que ambas hipóteses se confirman no mesmo caso.

Ridículo resulta, polo demáis, que o xuíz considere de relevancia se poida acceder a esa información «desde calquera computador, tecleando "guerra civil no Grove" nalgún buscador». Escribir, sexa no papel ou na rede, uns nomes que foron mil veces pronunciados en voz baixa polas vítimas da barbarie, faise para que sexa coñecido, e ninguén debería ser procesado nen censurado por iso.

Actualización: o texto censurado