O Concello de Compostela impide a entrada da cidadanía a un pleno municipal

A Policía Local recibe ordes directas de incumprir a lexislación, que marca que os plenos son públicos

O Movemento polos Dereitos Civís denuncia que a Policía Local de Compostela negou esta mañá a entrada a varias persoas, ante a sospeita de que fosen traballadoras da subcontrata de limpeza do Concello de Compostela. Se ben nun primeiro momento alegouse falta de espazo, unha excusa xa utilizada noutras ocasións semellantes, a continuación a Policía recoñeceu que non existía ese problema e que polo contrario existían ordes directas de “impedir o acceso por se entraban manifestantes”, como xa parecía evidente.

O Concello de Santiago usa a lexislación á carta e vulnera o dereito dos cidadáns a participar nos asuntos públicos cando molesta o seu exercicio, ante a simples sospeita de que se tratase dunhas traballadoras que quixeran denunciar publicamente a súa situación, o que non xustifica unha indefendíbel actitude preventiva. Incúmplese así a Lei reguladora de bases do réxime local (7/1985, artigo 70) que estipula que as sesións dos plenos das corporacións locais son públicas. Esta vulneración conta co agravante de proceder dunha administración pública que en teoría debe dar cumprimento á legalidade vixente e velar polos dereitos dos cidadáns. Evidentemente, este tampouco é o camiño para solucionar os conflictos sociais e laborais.

Non é a primeira ocasión en que o Concello de Santiago impide a entrada da cidadanía ao pleno, se ben até o de agora adoitaba recurrir a un suposto problema de espazo no salón de plenos (que só se daba no caso de existir un conflicto social) e agora xa se recoñece directamente por parte da Policía Local o incumprimento da lexislación.

Na prensa: Denuncian o impedimento de Raxoi para que as traballadoras da limpeza en folga fosen ao pleno