O MpDC amosa a súa máis profunda indignación con Unión Fenosa

O Movemento polos Dereitos Civís critica o trato e a incompetencia amosada por Fenosa. Este trato foi gravado pola empresa e, despois de o MpDC moito relear, tales conversas foron finalmente ao afectado. Pódese comprobar como cincuenta familias recén instaladas nunha nova urbanización quedan sen luz pola noite, chaman a Fenosa para que o seu problema se solucione e podan voltar as súas casas con normalidade, pero en lugar de iso descobren que se atopan nunha especie de oco legal. Pola mañá, a empresa Unión Fenosa instaloulles os contadores, como é normal e sen mostrar presa díxolles que formalizaran o contrato, pero o problema é que supostamente usan a luz de obra debido a que as vivendas aínda non están recepcionadas logo dunha mala xestión do promotor.

Fenosa, en lugar de buscar solucións e devolverlle a luz ás familias, aínda que sexa temporalmente para que non pasen a noite as escuras, líanse pedindo datos e xustificando que o corte de luz sigue o protocolo da empresa,segundo palabras duns dos traballadores “ la compañía no se hace responsable, en absoluto, ni garantiza que el suministro vaya (…) la compañía esta actuando con el protocolo que tiene para este tipo de desarollos”.

Ante a impotencia de escoitar como a empresa eléctrica non fai nada por arranxar o problema e limitase unicamente a xustificar a súa incapacidade para devolverlle a luz as familias, o interlocutor, pregúntalle ao teleoperador como pode conseguir unha copia da conversación, para ter constancia da incapacidade de actuación que ten a empresa ante un problema que deixa sen luz a 50 familias, ao que o traballador responde “personalmente no lo se”. O afectado ante semellante resposta solicita falar cun superior, cando a vai ser remitido ao un responsábel a chamada cortase misteriosamente.

O afectado repite a chamada a centraliña de Unión Fenosa e xa van tres, e vólvelle solicitar a operadora información de cómo pode conseguir unha copia da conversación anterior. A traballadora respóndelle “por escrito” sen especificar máis e ante a insistencia por saber como ten que facer para conseguila, a teleoperadora contéstalle: “a mí me habla en español, si no le importa, porque yo soy española, ¿de acuerdo? Muy amable” e ante a explicación de que leva todo o tempo empregando a lingua galega sen ningún problema a interlocutora dille “Me habla en castellano o acabamos la conversación”.

O MpDC sorpréndese pola mala educación amosada pola teleoperadora que, véndose atacada pola pregunta de como facer para ter acceso a gravación da conversación, responde esixindo que o interlocutor falase castelán. A traballadora está no seu dereito de non ter coñecemento da nosa lingua, se ben desde o Movemento consideramos que de ser así podería ter advertido dende un comezo o seu descoñecemento do galego e non esixir o cambio de lingua por parte do interlocutor cando levan falando 6 minutos, ela en castelán e el en galego sen ningún problema de comprensión por ambas as dúas partes. Hai que ter en conta que Unión Fenosa con fondas raíces galegas e son galegos a maioría dos seus usuarios, polo tanto debería ter coidado e prestar atención a que os seus traballadores non ofendan clientes.

Desde o Movemento polos Dereitos Civís queremos recordar que foi necesario un ano de papeleo e o apoio da Agencia Española de Protección de Datos para conseguir estas gravacións que en un primeiro momento Unión Fenosa negou facilitar, aínda estaren obrigados por lei. Lamentamos unha vez máis a desprotección do cliente ante as grandes empresas, que aproveitándose do descoñecemento da lei pola maioría da pobación pretenden vulnerar os seus dereitos.

O MpDC critica duramente a actitude tomada polos responsables de Unión Fenosa, tanto ante a chamada como despois a hora de facilitar as conversas. Non sabemos porque tanto interese en non querer facilitar as conversacións mantidas cos seus traballadores, cando saben perfectamente que a AEPD obrígalles a facilitalas.