Sobre a Carta de Dereitos dos Cidadáns

Do Movemento polos Dereitos Civís tivemos coñecimento da apresentación pública do proxecto de Carta de Dereitos dos Cidadáns de Galiza, que ten o propósito de eliminar as actitudes de "silencio, opacidade e prepotencia" na administración pública, nas palabras do Presidente da Xunta.

Desde o Movemento polos Dereitos Civís podemos ratificar que son moitas as dificuldades coas que se atopa a cidadanía para acceder á información das diferentes administracións, apesar de que os principios constitucionais e estatutarios establecen a necesidade de que nun Estado democrático de Dereito a Administración pública sexa transparente. Facémolo con pleno coñecemento e en base á experiencia acumulada desde o 2002, cinco anos nos que desenvolvimos unha constante tarefa de denuncia ante as institucións correspondente ás irregularidades percebidas, así como de colaboración coa cidadanía na tramitación das queixas recibidas.

Precisamente para tentar achegar solucións nesta materia, o MpDC xa expuxo un proxecto de Lei sobre o Acceso á Información en Poder das Administracións.

Entendemos que o proxecto de Lei de Acceso á Información é complementar en moitos aspectos ao da Carta de Dereitos. En concreto, o texto apresentado polo MpDC recolle unha ampla regulación deste dereito, no que atinxe a toda a toda información escrita, visual, sonora, electrónica ou en calquer outro soporte, e que que afectaría as Administracións públicas e tamén as empresas que ofrezan servizos públicos.

O MpDC dirixirase á Xunta de Galiza e ás distintas organizacións para aportar ideas e suxerencias no proceso de redacción desta Carta de Dereitos e fará seguimento activo da evolución do mesmo.