O MpDC denuncia a actitude antidemocrática do alcalde de Compostela ao impedir ao acceso ao pleno onde se aprobou outorgalle o nome dunha rúa a Manuel Fraga

• Sobre 40 persoas non puideron asistir á sesión na que se debate a proposta de Conde Roa para pór o nome de Manuel Fraga a unha rúa
• Enviáronse 1900 cartas a Conde Roa e 600 firmas
• O MpDC seguirá coa campaña de recollida de sinaturas para impedir que se concrete a proposta. asina

O Movemento polos Dereitos Civís manifesta publicamente a súa repulsa á actitude antidemocrática amosada esta tarde polo Concello de Santiago de Compostela ao impedir o acceso á sesión plenaria a un grupo de 40 cidadáns contrarios á proposta do alcalde de dedicar unha rúa da cidade a Manuel Fraga Iribarne.

Para o MpDC actuacións como a posta en práctica esta tarde demostran a falta de talante dialogante deste goberno, que nega os dereitos básicos dos seus administrados, como é o de asistir e participar nas sesións plenarias, mais non pon trabas á hora de pretender homenaxear cunha rúa a unha personalidade política cando menos controvertida e que non merece tal recoñecemento social.

O alcalde de Compostela semella esquecer as actuacións de Manuel Fraga Iribarne durante a súa prolongada vida política, quen, entre outras cousas, protagonizou algunhas das decisións máis claramente antidemocráticas do franquismo. Cómpre destacar tamén que unha proposta semellante feita polo anterior rexedor local tivo que ser retirada logo das miles de sinaturas recollidas e entregadas ao Concello en contra de tal decisión.

Renato Nüñez, portavoz do MpDC, laméntase que o Gerardo Conde Roa prefira homenaxear figuras que se teñen amosado contrarias aos valores democráticos máis básicos antes que defender e facer valer os dereitos recoñecidos de todos os cidadáns e cidadás do seu Concello.


Á saida do Pleno os axentes retiveron a varios asistentes para reclamara asúa identificacións, algo que xa se fixera o entrar, e lle impediu os saír do edificio.