Seis de cada dez galegos considera que as cargas policiais son desproporcionadas ou inxustas

Unha enquisa encargada polo Movemento polos Dereitos Civís revela que máis da metade da poboación cre que os xuíces tenden a favorecer as Forzas de Seguridade fronte aos cidadán.

Nove de cada dez enquisados opina que se deberían instalar cámaras nas dependencias policiais .

A creación dunha axencia independente para vixiar os Corpos de Seguridade é apoiada por 2 de cada 3 galegos.

O 56,9% dos entrevistados considera que os axentes manipulan os seus informes

Seis de cada dez galegos considera que as actuacións policiais nos actos de protesta social acostuman a ser inxustificadas e desproporcionadas. Así se desprende do estudo "Relación entre a cidadanía e Forzas de Seguridade", encargado polo Movemento polos Dereitos Civís a unha consultora independente, e que configura o primeiro bloque de datos da enquisa "A situación dos Dereitos Civís na Galiza". Os datos do informe revelan que o 37,2% das persoas consultadas cre que en ocasións os axentes "se poñen nerviosos e se lles vai a man", mentres que o 21,9% opinou que a policía acostuma a "abusar da forza nas cargas policiais". É dicir, o 59,2% dos enquisados considera que as cargas policiais empregadas para disolver actos como manifestacións ou concentracións non acostuman a ser xustificadas e proporcionadas. Pola contra, só o 32,4% dos entrevistados opina que practicamente "sempre" estas cargas son xustificadas e adecuadas.

Do estudo tamén se desprende que o 53,8% dos galegos considera que cando os cidadáns denuncian ás Forzas de Seguridade do Estado os xuíces que se fan cargo dos litixios non tratan do mesmo xeito a ambas partes, senón que, pola contra, tenden a favorecer aos axentes. Fronte a este dato, o 30,3% dos enquisados respondeu que a xustiza outorga o mesmo trato aos cidadáns que aos Corpos de Seguridade, mentres que tan só o 1,5% dos consultados considera que os maxistrados favorecen aos cidadáns en prexuízo dos axentes. Como dato curioso, a opinión sobre a parcialidade da Xustiza de cara ás forzas de seguridade medra entre a poboación de ámbito rural, chegando a acadar un 60%.

Abuso de autoridade

Outra das cuestións que cabería destacar refírese ao abuso de autoridade por parte das Forzas e Corpos de Seguridade. De todas as persoas entrevistas, dous de cada dez aseguraron ser vítimas ou coñecer a alguén que sufriu trato descortés ou abuso de autoridade, acadando o 18,5% do total de enquisados. E deste 18,5% unha porcentaxe significativa (o 5,1%) afirmou que sufrira trato inapropiado en varias ocasións. Para o voceiro do MpDC, Renato Núñez, resulta preocupante que un Estado de Dereito poida considerar aceptable “o feito de que 1 de cada 5 cidadáns sexa vítima dunha actuación inapropiada por parte dos funcionarios que deben velar polos seus dereitos”.


Noutra das cuestións prospostas á cidadanía, comprobouse que o 56,9% dos entrevistados consideran que os axentes manipulan os seus informes e os axustan aos seus intereses coa finalidade de ocultar aquelas actuacións incorrectas, mentres que só o 30,6% cre que as Forzas de Seguridade sempre actúan de xeito correcto e os informes que elaboran son imparciais.

Renato Núñez afirmou que os resultados obtidos tras o análise do estudo demostran “a necesidade de crear unha axencia independente capaz de controlar as actuacións desproporcionadas dos axentes”, un organismo que o MpDC vén reclamando dende o seu nacemento e que contaría co apoio de dous de cada tres galegos, segundo os resultados da enquisa.

Por último, tan só o 14,3% do total dos entrevistados opina que o actual Consello Autonómico de Seguridade Cidadá resulta útil, mentres que o 65,8% cre que se trata dunha institución pouco ou nada válida. Hai que lembrar, que o Consello foi constituído o pasado ano, e que, dende entón, non se volveu reunir.

Cámaras nas comisarías

No que respecta á seguridade dentro das comisarías, nove de cada dez enquisados opina que se deberían instalar cámaras nas dependencias policiais para garantir o respecto dos dereitos dos cidadáns e evitar que se leven a cabo prácticas irregulares. Neste sentido o voceiro do MpDC preguntouse “por que habendo un apoio tan grande para que se instalen eses dispositivos nas comisarías, a Delegación do Goberno se nega. Acaso terán algo que ocultar?”.