Perspectivas de futuro dos xogos (II)

A pesar do inconveniente da uniformización cultural predominante,
debemos ter presente que os xogos populares educan a sociedade no
sentido máis amplo do termo: forman física e mentalmente, son un
vieiro de novas experiencias e constitúen parte esencial da nosa
cultura. A necesidade de coidalos e mantelos é común a toda a nosa
contorna europea. En consecuencia, créanse proxectos de recuperación,
moitas veces vencellados á Asociación Europea de Xogos e Deportes
Tradicionais, entidade á que pertence Brinquedia. E a nivel
internacional, a UNESCO recoñece o importante papel dos xogos na
construción dunha cultura da paz.
A situación en Galicia ten que dar un xiro se queremos seguir un bo
rumbo. Mais non sopran ventos favorables nos últimos tempos; o goberno
actual púxolle freo ao proxecto dun Plan Estratéxico presentado a
comenzos do ano pasado e que tiña como metas: a recuperación dos xogos
e deportes populares e tradicionais a nivel local; a revalorización
social como actividade colectiva e de ocio; a súa divulgación,
ensinando as técnicas e normas do xogo e promovendo a implantación no
ámbito escolar e entre as familias; e, por último, a creación dunha
normativa de base común para celebrar competicións dentro e mesmo fóra
de Galicia. Obxectivos necesarios para o porvir dos xogos no noso
país.


Lidia Barreiro Felpeto
(Asociación Galega do Xogo Popular e Tradicional, www.agxpt.org)