Ola lector ,  benvido  |  entra  |  rexístrate agora  |  Axuda?

O MpDC pide información sobre a actuación policial acontecida en Celanova

Written By MpDC on 1/3/10 | 13:20

O Movemento polos Dereitos Civís ven de presentarlle un escrito ao IES Celanova e a Policia Local da localiade ourensana pedíndolles información sobre a desproporcionada actuación da policía no citado centro de ensinanza o pasado entroido. Uns "mecos" colgados das fiestras do instituto que aludían ao posible traslado do centro foron retirados nunha manobra policial totalmente fóra de lugar.

Desde o MpDC enténdese que a actuación policial, respaldada pola dirección do IES Celanova, supón unha vulneración do libre dereito á educación e á liberdade de expresión.


É coñecido que os centros de ensino organizan actividades arredor do entroido. No IES de Celanova unha destas actividades versou sobre a actualidade que rodea o traslado do centro pero a Policía Local e posteriormente a policía adscrita "procederon a contactar co equipo directivo para intentar a retirada dos bonecos, segundo parece debido a unha denuncia”, tal e como informou o Faro de Vigo na súa edición de Ourense.

É sorprendente que se empreguen os corpos de seguridade para impedir unha actividade de Entroido nos centros educativos, feito que lembra máis á ditadura franquista que a unha democracia. Desde a asociación critícase enerxicamente este despregue de forzas e corpos de seguridade cuxo fin foi retirar uns bonecos dun edificio.

Parece, aos ollos do Movemento, que a finalidade desta acción puidera ser a de intimidar a cidadanía para que cese nas críticas ao traslado do centro, feito que, de ser certo, sumaríase á longa lista de despropósitos cometidos polos corpos policiais contra todo aquilo que poida desestabilizar as decisións tomadas polas administracións.

Ademais, o MpDC tamén cre que este feito atenta contra a liberdade de expresión, xa que unha parte da sociedade se veu privada deste dereito ao censurarse a súa posibilidade de manifestar publicamente unha opinión. A todas luces, unha actuación policial deste calado merece ser explicada no Parlamento, xa que estamos asistindo a un abuso da autoridade e a unha privación das liberdades e dos dereitos das persoas intolerábel en calquera sociedade.

0 comentarios:

Publicar un comentario