O Movemento denuncia o novo ataque sufrido polo Centro Social Aturuxo de Boiro

O local social Aturuxo de Boiro volveu ser atacado, “o que non é un acto illado, nin casual”, afirman desde o colectivo. O suceso aconteceu este venres, se ben, os ultimos dias xa desde o colectivo souberon de comentarios “violentos e claramente fascistas” cara o seu local e o que Aturuxo representa ao respecto da defensa dos dereitos das persoas e dos pobos. Ao respecto, o Movemento polos Dereitos Civís non pode senón expresar o seu maior rexeitamento aos que cometeron este ataque no que foi un acto covarde mais cheo de xenreira cara quen defende o común e a sociedade.

Nesta ocasión, os vidros exteriores do local estalados por un impacto é o resultado do ataque. Foron escoller a semana na que se celebran varias datas importantes nas que diferentes pobos venceron o fascismo, contextualiza Aturuxo. O pobo portugués, que derrotou a ditadura no 25 de abril de 1974 e, tamén, o pobo italiano liberábase do goberno fascista de Musolini no 25 de Abril de 1945. Seguramente estes “pequeno-fascistas, criados no analfabetismo e na incomprension do propio e do diferente” non saiban destes dous acontecementos historicos, pero non deixa de ser triste que na semana que uns celebramos a liberdade do pobo portugués e recordamos a revolta italiana de 1945, “uns malditos queiran silenciarnos violentamente”, continúan a dicir desde o centro social barbanzano.

Tanto Aturuxo coma o Movemento coinciden en que “estas actitudes non deben ter sitio na nosa sociadede”, senón que é preciso plantar cara firmemente aos “ataques fascistas”, así como facer tamén fronte ao “sentimento de autoodio e esquizofrenia” que poñen en práctica cando atacan a todas as e os que defendemos a lingua, a cultura e un futuro digno e prospero para o noso país.

A denuncia ante o sucedido, así como o reclamo a poder exercer os dereitos como cidadáns que somos de expresármonos libremente de xeito individual ou asociativo, como neste caso, son outras das reivindicacións que o MpDC fai ao respecto. Ademais, hai que ter en conta que actos coma o desta fin de semana en Boiro parten dunha oposición aberta á defensa do galego e de Galiza, así como da súa cultura e identidade, feitos estes postos en valor polo Movemento, por Aturuxo e por tantos outros colectivos do país. Pola dignidade e os dereitos.