A finais de 2008, cando a Plataforma Cidadá "Que Volten á Casa” organizou a II Festa pola Liberdade nas instalacións da Sala Nasa, o local cultural foi vítima de graves acusacións por parte do líder popular compostelán, Gerardo Conde Roa, quen contou coa complicidade de medios de comunicación afíns.
A Sala NASA é un dos grandes refrentes na vida cultural de Santiago de Compostela e do resto de Galiza. É tamén un exemplo de que se pode manter unha programación cultural alternativa e exitosa sen necesidade de sucumbir á presión da rendibilidade económica inmediata. Na NASA (siglas de Nave de Servizos Artísticos) practican a liberdade de expresión, pero tamén a independencia. Porén, parece haber a quen non lle chista moito o primeiro, e mesmo lle causa ardores o segundo.
Parece ser este o caso do voceiro do Partido Popular en Compostela, Gerardo Conde Roa. A finais do ano 2008, a plataforma cidadá “Que Volten á Casa” decidiu organizar na Sala a II Festa Pola Liberdade. Naquelas datas, Gerardo Conde Roa acusou o local de realizar
homenaxes a “terroristas” con fondos públicos.
O líder popular ignoraba –accidental ou deliberadamente?- que ese acto non o promovía a NASA, senón que esta simplemente alugaba as súas instalacións, polo que tampouco se trataba de ningún acto subsidiado. A pesar de se tratar de afirmacións gravísimas e baseadas en datos errados -ou directamente falsos-, atoparon apoio en medios de comunicación afíns como a COPE-, que as difundiron e multiplicaron a súa repercusión.
Pasaron días, semanas, meses, e desde o PP de Compostela non rectificaron estas acusacións, como tampouco o fixeron os medios de comunicación que as transmitiron. Máis acusacións Logo dos incidentes do día 8 de febreiro deste ano, orixinados após Galicia Bilingüe ter convocado unha manifestación en Compostela, Conde Roa volveu á carga e alén da NASA estendeu as súas difamacións sobre outros locais e asociacións legais da cidade, acusándoos de seren os promotores do que chamou “kale borroka gallega”.
Acto ridiculista
Como protesta ante a actitude do Partido Popular compostelán, desde a Sala NASA decidiron organizar un acto de desagravio para o día 27 de marzo, que ademais foi o Día Internacional do Teatro. Inspirándose nos ridiculistas que no día 8 de febreiro utilizaron todos os tópicos españois -toureiros, bailaroas, gardas civís ou o Cid, entre outros- para protestareon contra a españolización, na NASA fixeron algo similar, pero coa materia terrorista.
Así, elaboraron un panfleto con dúas caras. Unha, presidida polo lema “Así é como queren algúns que nos vexas”, presentando a continuación o equipo da Sala NASA caracterizado como terroristas. A outra face, co lema “Así é como somos na realidade”, coas caras de todo o persoal ao descuberto.
Foto para Conde Roa Ao acto acudiron algo máis de 300 persoas, entre elas rostros tan coñecidos como os de Quico Cadaval, Uxía Senlle, Carlos Blanco, Xosé Manuel Beiras, Ugia Pedreira, Comba Campoy, Pepa Yáñez, Luís “Foz” ou Carlos Santiago. Ademais, como parte da protesta, as e os participantes posaron para unha foto de familia que tivo tamén dúas versións. Unha, coas caras tapadas para imitaren os terroristas, e a outra xa coas caras ao descuberto.
Xesús Ron, o responsable da NASA, prometeu autografar as fotos e enviarllas a Conde Roa. A liberdade de expresión é un dos dereitos fundamentais que con maior frecuencia resultan conculcados. Para o Movemento polos dereitos Civís (MpDC) non hai dúbida de que as graves acusacións realizadas polo voceiro do PP compostelán van na dirección de pretender conculcar este dereito.
Por ese motivo, a organización cívica expresou a súa solidariedade coa Sala NASA e apoiou e animou á participación no acto ridiculista convocado por este local
cultural. O MpDC fixo tamén fincaré na importantísima función de dinamización social e cultural que cumpre a NASA na capital de Galiza desde 1992.
0 comentarios:
Publicar un comentario