Ola lector ,  benvido  |  entra  |  rexístrate agora  |  Axuda?

O Defensor del Pueblo leva dous anos esperando un informe do Concello de Santiago

Written By Virgulino on 6/1/09 | 13:04

O Concello de Santiago segue negándose, despois de máis de dous anos e medio, a facilitar ó Defensor del Pueblo un informe policial que xa lle foi solicitado en dúas ocasións por esta institución. Con anterioridade fora o Movemento polos Dereitos Civís o que solicitara ó Concello información sobre as desproporcionadas medidas e os controis realizados pola policía durante o 25 de xullo de 2006. Perante o silencio e a vontade obstrucionista do goberno municipal, o MpDC pregúntase canto tempo mías pensa agardar o Defensor antes de declarar ó concello como institución hostil e en aplicar as medidas e sancións pertinentes.

O Movemento polos Dereitos Civís considera que chegados a este punto, e tendo amosado o alcalde de Santiago un absoluto desprezo polo dereito de petición dos cidadáns e polos solicitudes do Defensor, a única saída posible é incluír de novo ó Concello na lista de entidades hostís e entorpecedoras. Fai xa medio ano que Enrique Múgica enviou ó Concello unha segunda petición, de carácter urxente, solicitando a presentación do informe policial sobre os feitos acontecidos na capital en xullo de 2006. O Defensor del Pueblo intervira no caso a petición do MpDC, que viu coma a petición de información presentada ó Concello en novembro de 2006 era totalmente ignorada pola administración. O Defensor censurou esta denegación do dereito de petición que asiste á asociación e requiriu a presentación do informe solicitado.

A resposta do Concello non puido ser máis infantil, pois negou ó Defensor del Pueblo a existencia dun expediente da petición de información, cando o MpDC garda copia do documento con data de entrada no rexistro. O Concello non só mentiu á institución encargada de velar polos dereitos dos cidadáns, senón que se obstina tamén en negarlle o acceso ó informe en cuestión. Por desgraza, non se pode afirmar a estas alturas que resulte sorprendente a actitude escurantista do alcalde Sánchez Bugallo, que parece ter feito da opacidade un dos seus eixos de goberno.

Non se pode ignorar, non obstante, a gravidade do feito de negar a cidadáns ou asociacións o lexítimo dereito de petición, coa conseguinte restrición da participación informada na vida pública. Neste caso, o MpDC quería coñecer as causas e motivacións que levaron á policía a desenrolar un desproporcionada e invasivo dispositivo durante o 25 de xullo de 2006. Durante eses días sucedéronse os controis, os cacheos, as medidas restritivas do dereito de circulación e uso do espazo público. O Movemento solicitaba o acceso os informes policiais que deberían existir de calquera actuación das Forzas de Seguridade. Negar o acceso ós mesmo só contribúe a fomentar unha cultura da impunidade e arbitrariedade nas actuacións da policía que non beneficia en absoluto nin a esta nin, por suposto, ós cidadáns. O MpDC agarda un pronunciamento do Defensor que condene e sancione esta persistente opacidade administrativa.

0 comentarios:

Publicar un comentario