Varios seareiros do Compostela denuncian actuacións desproporcionadas e detencións arbitrarias por parte da Policía

O Movemento polos Dereitos Civís recibiu nas últimas horas varias denuncias sobre a desproporcionada actuación dos Corpos e Forzas de Seguridade durante o partido do pasado domingo entre o Pontevedra B e o Compostela. Dous afectados dirixíronse a asociación solicitando asesoría xurídica, perante a actitude inxustificadamente agresiva e as detencións arbitrarias levadas a cabo pola Policía. Dous afeccionados do club santiagués foron detidos, acusados de atentado e resistencia a autoridade. O Movemento estuda as circunstancias legais do caso e valorará a existencia ou non de lesións dos dereitos fundamentais dos afectados.

Os incidentes acaeceron o pasado domingo, durante a celebración do encontro que enfrontaba en Pasarón ó Compostela co Pontevedra B. As Forzas e Corpos de Seguridade prepararon un despregue de efectivos absolutamente inhabitual para un partido de terceira división, sen que existisen antecedentes de altercados graves con seareiros dos equipos que xustificasen semellante operativo. As testemuñas falan da presencia de varios vehículos da Policía Nacional, así como de distintos axentes de Antidisturbios procedentes de Vigo.

Antes do encontro e durante o mesmo sucedéronse as medidas, aparentemente inxustificadas, para controlar os movementos dalgúns grupos de afeccionados do Compostela, que denunciaron a actitude agresiva e provocadora dos axentes. A tensión foi en aumento, e durante a celebración dun dos tantos algúns efectivos policiais cargaron contra un dos seguidores. Segundo relataron os afectados, ó solicitar a identificación do axente que o golpeara, o mozo foi desaloxado do estadio e levado a comisaría.

Ó parecer as intervencións policiais continuaron no interior do estadio, e varios afeccionados queixáronse das agresións recibidas en forma de patadas e golpes. Outro mozo foi detido durante os incidentes, e trasladado a comisaría, negándose a prestar declaración ó igual que o outro detido.

O Movemento polos Dereitos Civís expresa a súa indignación perante os feitos, e pregúntase polos motivos da evidente predisposición policial contra os seareiros. Todas as fontes consultadas sinalan a desproporcionada actuación dos axentes como a desencadeante dos incidentes. O MpDC está a preparar un informe sobre os pormenores legais do caso, e ofrecerá apoio xurídico ós afectados e a aquelas persoas que decidan presentar denuncias polas agresións sufridas.